Serikali Wilaya ya Siha yapiga Marufuku biashara ya mahindi ya kuchoma

Uongozi wa Serikali katika Wilaya ya Siha Mkoa wa Kilimanjaro  umepiga marufuku biashara ya mahindi ya kuchoma katika maeneo yote Wilayani hapa.

Azimio hilo limetolewa leo tarehe 14 Juni,2017 na Wenyeviti wa Vijiji Wilaya ya Siha walipokutana  na Mkuu wa Wilaya ya Siha katika ukumbi wa mikutano wa Halmashauri ya Siha kwa lengo la kuzungumzia mambo mbalimbali ya maendeleo katika Wilaya ya Siha.

Wenyeviti hao wa Vijiji  kwa kauli moja walimwomba Katibu Tawala wa Wilaya ya Siha Mhe. Nicodemus John   ambaye alimwakilisha Mkuu wa Wilaya ya Siha kuwa,kutokana na wizi wa mahindi mabichi unaoendelea katika maeneo mbalimbali ya Siha wameona ni bora kumwomba Mkuu wa Wilaya kupiga marufuku biashara hiyo hadi mazao ya mahindi  yatakapovunwa mashambani.

Katika Azimio hilo,sababu zilizotolewa na Viongozi hao za kutoa ombi kwa Mkuu wa Wilaya ya Siha kupiga marufuku biashara hiyo ni pamoja na kuzuia wizi wa mahindi mashambani  na sababu nyingine ni jitihada za kuhakikisha chakula kitakachovunwa kinatumika vizuri kwa manufaa ya ustawi wa jamii.

Aidha katika kikao hicho,Mwenyekiti wa Kijiji cha Wiri Mheshimiwa Hamza Munisi aliishukuru Serikali ya Wilaya ya Siha kwa jinsi inavyosimamia kikamilifu sheria mbalimbali hasa za uhifadhi na utunzaji wa mazingira katika maeneo mbalimbali.

Mheshimiwa Hamza pia alishauri kuwa wale wote wanaofanya biashara ya mahindi ya kuchoma ni vema watafute biashara nyingine kwa wakati huu katazo hilo linapotolewa rasmi.

Akichangia na kujibu hoja mbalimbali za Wenyeviti wa Vijiji katika Mkutano huo,Mkurugenzi Mtendaji wa Halmashauri ya Siha Valerian Juwal aliwashukuru Wenyeviti wa Vijiji vyote Wilayani Siha kwa ushirikiano wanaendelea kuutoa kwa serikali kwa lengo la kuharakisha maendeleo ya Wananchi Wilayani Siha.

Mkurugenzi Mtendaji aliwaahidi Wenyeviti hao kuwa,Halmashauri ya Siha itaendelea kufanya kazi kwa misingi ya kufuata  Sheria zilizopo na kuwataka Watendaji wa umma kuhakikisha wanachapa kazi kwa uadilifu na kuwatumikia wananchi bila ubaguzi wowote.

Kutokana na sensa ya idadi ya watu na makazi ya mwaka 2012,Wilaya ya Siha inajumla ya watu 116313 kati yao  Wanawake wakiwa 59813 na Wanaume 56500

Siha kuazimisha Siku ya watu wenye Ualbino tarehe 15 Juni,2017

Wilaya ya Siha kuazimisha siku ya watu wenye Ualbino

Halmashauri ya Wilaya ya Siha mkoa wa Kilimanjaro itaazimisha siku ya watu wenye Ualbino(Albinism)  siku ya Alhamis  tarehe 15 Juni,2017.

Maazimisho ya siku ya watu wenye Ualbino  Kiwilaya yanategemewa kufanyika katika ofisi ya kijiji cha Lawate huku kauli mbiu ya mwaka  2017 ikiwa “Umuhimu wa takwimu na tafiti kwa ustawi wa  watu wenye Ualbino”.

Aidha,maazimisho hayo yatafanyika kwa mara ya kwanza Wilayani Siha kwa mwaka 2017, huku Wilaya ya Siha ikiwa na historia nzuri ya kuwatunza na kuwalinda watu wenye Ualbino.

Hadi sasa Wilaya ya Siha haina tukio lolote lililotokea na kuripotiwa juu ya kitendo chochote cha kuwanyanyasa,kuwajeruhi au mauaji ya walemavu wa ngozi waliopo katika Wilaya ya Siha.

Mkurugenzi Mtendaji wa Halmashauri ya Siha anatoa wito kwa Wananchi na Wakazi wa Wilaya ya Siha kuendelea na moyo huo wa upendo wa kuwatunza na kuwalinda ndugu zetu wenye Ualbino hasa kwa kuwapatia mahitaji yao muhimu kama elimu,huduma za Afya na huduma nyingine muhimu.

Wilaya ya Siha inakadiriwa kuwa na watu wenye Ualbino wapatao 11 ambao wanaishi na jamii katika maeneo tofauti tofauti Wilayani hapa.

Chanjo ya Kichaa cha Mbwa kuanza kutolewa Hospital ya Wilaya

OFISI YA RAIS TAMISEMI

HALMASHAURI YA WILAYA YA SIHA

TAARIFA KWA UMMA

Mganga Mkuu wa Hospital ya Wilaya ya Siha anawatangazia Wananchi wote Wilayani Siha kuwa, Chanjo ya Kichaa cha Mbwa sasa inapatikana katika hospital ya Wilaya ya Siha kwa bei nafuu kabisa ya Shilingi elfu 30 tu.

Hivyo kwa wale wote watakaopata matatizo ya kung’atwa/kuumwa na Mbwa  wafike hospital ya Wilaya ya Siha na watapatiwa matibabu mara moja.

Aidha,kupatikana kwa huduma hii muhimu kutawasaidia Wananchi wa Wilaya ya Siha kuepukana na usumbufu wa kuwapeleka wagonjwa wao katika hospital ya Mkoa wa Kilimanjaro Mawenzi ,ambapo huduma hizi zilikuwa zinapatika hapo awali.

Wananchi na Wakazi wa Wilaya ya Siha mnaombwa kutumia fursa hii muhimu ya matibabu ili kuokoa maisha ya ndugu, jamaa na marafiki zetu wanaopatwa na janga la kung’atwa na Mbwa.

Matibabu ya Chanjo ya kichaa cha Mbwa yanatolewa kwa binadamu aliyeng’atwa na Mbwa matibabu yanapatikana muda wowote  katika Hospital yetu ya Wilaya ya Siha.

Hata hivyo,Halmashauri ya Wilaya ya Siha inatoa wito kwa Wananchi na Wakazi wa Wilaya ya Siha kufungia Mbwa  nyakati za mchana ili kuzuia  madhara kwa binadamu.

Tunawashukuru Wananchi kwa ushirikiano wetu wa dhati, tunaomba upatapo taarifa hizi umjulishe na mwenzako.

Limetolewa na:-

Kitengo cha Habari na Mawasiliano (W) Siha

Juni 09,2017

Watumishi wa Umma Siha waendelea na Uhakiki

ZOEZI LA UHAKIKI KWA WATUMISHI WA UMMA- SIHA

Zoezi la uhakiki wa akaunti za mishahara kwa Watumishi wa Umma Wilayani Siha limefikia siku ya tatu leo tangu lilipoanza  siku ya ijumaa tarehe 02 Juni,2017. Zoezi hili linafanyika katika  Ofisi za Makao makuu ya  Halmashauri ya  Wilaya ya Siha. 

Hadi sasa zoezi  linaendelea kwa mafanikio makubwa hasa baada ya Watumishi wengi wa Umma katika kada mbalimbali kuonekana wakiendelea na kazi kukagua majina yao na kuhakiki kama yanaendana majina yaliyopo katika orodha ya mishahara(payroll).

Zoezi la Uhakiki kwa Watumishi wa Umma katika Wilaya ya Siha linategemewa kumalizika tarehe 06 Juni, 2017.

Uandikishaji Darasa la Kwanza 2017 asilimia 99

Zoezi la uandikishaji wanafunzi wa darasa la kwanza katika shule za msingi Wilayani Siha umetia fora kwa mwaka 2017. 

Kwa mujibu wa taarifa iliyotolewa  kwa mgeni Rasmi  Mhe Onesmo Buswelu Mkuu wa Wilaya ya Siha katika maazimisho ya siku ya elimu Wilayani Siha yaliyofanyika katika shule ya msingi Sanya Juu tarehe 30.5.2017.

Uandikishaji wa Wanafunzi katika shule za msingi umefanyika kwa mafanikio makubwa na jumla ya Wavulana 1690 na wasichana 1675  ambapo jumla ya Wanafunzi wote waliandikishwa ni 3365 sawa na asilimia 99 ya lengo la uandikishaji kwa  mwaka 2017.

Taarifa iliyotolewa ilieleza kuwa Kufanikiwa kwa zoezi hili la uandikisha kumetokana na Sera ya Serikali ya Tanzania ya Elimu bila malipo kuanzia kidato awali hadi kidato cha Nne.

Halmashauri ya Wilaya ya Siha ilikuwa imeweka lengo la kuandikisha jumla la wanafunzi 3405 wakiwemo wasichana 1655 na wavulana 1753 kwa mwaka 2017.

Aidha, moja ya sababu ya kutofikiwa malengo ya uandikishaji wa wanafunzi kwa asilimia 100 umetokana na baadhi ya jamii ya wafugaji kuwa na tabia ya kuhama kutoka sehemu moja hadi nyingine kwa lengo la kufuata malisho ya mifugo yao.

Akiongea na wadau wa elimu ,Wanafunzi,Walimu na Wazazi Wilayani Siha Mkuu wa Wilaya ya Siha Mhe.Onesmo Buswelu aliwataka wazazi na Walezi kuendelea kushirikiana na Serikali ili kuchochea ufaulu wa Wanafunzi katika Shule za Msingi na Sekondari.

Mkuu wa Wilaya ya Siha, alisema kuwa Serikali kwa upande wake itaendelea kutoa ajira kwa walimu ili kuziba upungufu  wa walimu uliopo katika baadhi ya shule hasa walimu wa masomo ya Sayansi na hisabati.

Halmashauri ya Wilaya ya Siha imesajili jumla ya wanafunzi 23,198 wa shule za msingi kati yao wavulana 11,594 na wasichana 11,604, ambapo kwa shule za sekondari kuna jumla ya wanafunzi 7,121 wakiwemo wavulana 2,919 na wasichana 4,202 hivyo kufanya jumla ya wanafunzi wote  katika shule za msingi na Sekondari  Wilayani Siha kufikia 30,319.